2013北非摩洛哥 Day 14 & 15 @ Casablanca – Doha – HK

2013北非摩洛哥 Day 14 & 15 @ Casablanca – Doha – HK (27-28 Sep-2013)

今日是在摩洛哥的最後一日了，來摩洛哥時， 我同老公每人都帶了 3個杯麵來，但我只在菲斯時食了一個，所以今朝的早餐便是剩下來的杯麵了。

朋友之前已提示我地可在地下的餐廳取熱水，昨晚來攞熱水時已知道水機位置，所以今朝可以完全自助了。

因為今日是搭19:50機離開，我地都有成日可以行街， 行程早已安排會去 Morocco Mall，除此以外重可以去邊呢?

我地唔想再去舊城區，想去下一些未去過的地方。。。記得之前在旅遊書上有介紹過一些景點/購物點，我地找到在離酒店不遠處有個地方叫 Habbous，諗住去下呢度。

食完早餐，收拾行李後 check-out，我地將行李寄存在酒店內，等行完街後才回來取行李。

因為見 Habbous 的位置不遠，我地決定行去，大約30分鐘行程。可能時間尚早(10點左右)，遊客不多，行得很舒服。

這裡其實也是一個舊城，舊皇宮也此處，在算是個購物點，有賣皮鞋的小店，有賣手工藝的，有買玻璃餐具、tagine 等等，在這裡買手信是個不錯的地方。。。我本來想買對鞋，可惜睇唔啱款，最後買了幾個迷你 tagine 擺設，迷你玻璃杯等記念品，總算行了過來沒有空手而回。

我們在這兜了一圈便離開了。。。

在路邊找到了 petit taxi，直接坐去 Morocco Mall，車費打錶 MAD36。在快到達 Morocco Mall 之前，我地見到一個建築在海邊小島但有小橋接通的小村。我地覺得很特別，所以在 Morocco Mall 外落車後，就決定行返轉頭先去那個小島看看。

感覺很是特別，小島面向大西洋，見有人在釣魚，海面也幾大浪，都有 d 危險。。。島上有幾戶民居，我地行入去參觀，有一戶養了幾隻羊。。。遠處可以見到 Hassan II Mosque，我們在這看了一陣風景後，行返去 Morocco Mall 了。

有人在岸邊玩水。。。

觀浪。。。

 遠處可以見到 Hassan II Mosque

Morocco Mall 是 Casablanca 最大的商場，內裡都是名店，內裡有一個幾大的遊戲機中心及一個水族館及有一間電影院，算是這裡的特色吧。。。我覺得商場無乜特別，但對當地人來說，這個大型商場就可能很前衛了。。。

遠處建築物就是 Morocco Mall 

因為我們的現金都用得七七八八，見這裡有銀行，本想在銀行內換錢，職員說可在柜員機換，柜員機接受幾種國家的貨幣，當然兌換率一定差少少，但我地換得唔多，所以都無所謂，放入紙幣後，會顯示兌換金額，由於柜員機也只是出紙幣，所以零頭就會被扣了，所以自己要先計計換多少，盡量把被被扣的減少。

換完錢， 我地先在 food court 食午餐， food court 看似很多選擇，但其實都是 pizza、burger 之類，我地都想食湯麵，本來有些越式及泰式小店，但有些未開有些說沒有湯麵。。。最後老公選了沙津，我選了 pizza。。。

我們找到面向大西洋的枱坐下，一邊吃眼前的食物，一邊欣賞旁邊無敵海景。。。吃飽我地到地下的 supermarket 行下，老公居然在 supermarket 有收穫。。。。

離開商場，在商場外已有一些 taxi 在等客，其中有一個司機很熱情的招呼老公，老公說meter，要打錶，司機說無問題，我地都很奇怪咁順灘，再三確認是按咪錶計後便上車。。。沿途老公都有留意咪錶有無問題，當車去到 Hassan II Mosque 時，我地見風景很靚，便舉起相機影相，就在這前後不到一分鐘的過程，咪錶由原本不到 MAD10，已跳到 MAD30多元了，這時我同老公都心中有數，當到達火車站時，咪錶已去到 MAD60 多元了，當時老公已很勞氣，在車上已和司機吵架，老公衝落車大罵司機不誠實，有途人過來了解事件，老公說最多只付 MAD40 (之前朋友提示也是大概這價錢，而且從 Habbous 去 mall 比火車站去更遠也只是 MAD36)，司機見已引起很多人注意，而且我們所付的不會少過正常車費，他收錢後也立即離開了。真沒想到，如果他們有心呃錢，真是無所不用其技。。。

回到酒店取回行李我們便坐火車去機場，踏上歸途了。

原以為可在機上影到 Hassan II Mosque  ，不過相機質素不高，所以睇唔清了。



後記: 要搭很長途的飛機一點也不輕鬆，15日行程同朋友一齊分享歡樂時光當然開心。去非洲給人的感覺等同是去落後及貧窮的地方，但來到發覺一點也不落後 (部份原因是我們去的地方多是旅遊區)，也有它資源豐富的一面。但就算我們參加的4日3夜的沙漠團要深入內陸，沒有網絡通訊，沒有充足的電力，我也不覺得是”落後”，反而是覺得很原始，很大自然，但能夠來到真的是一個難忘的經歷。我亦很慶幸我有機會能去當地人的家參觀，認識這地方多一點點。

上載這最後一日遊記時已是一年之後，幾乎難尾收場，幸好之前已寫了一半，所以也能順利完成，記下了美好的回憶。。。

2013北非摩洛哥 Day 13 @ Rabat - Casablanca

2013北非摩洛哥 Day 13 @ Rabat - Casablanca (26-Sep-2013)

今日要離開 Rabat 返返去 Casablanca，食完早餐收拾行李後，便準備離開。我地同 Sammy 講我地會搭電車去火車站，佢話電車唔到，叫我地搭的士過去。。。我諗佢應該無試過搭，所以唔知電車係可以去到火車站的。。。

我地買咗11:45分的火車票，頭等車票 MAD55，車程1小時。

Rabat 火車站都幾靚，牆下的坐位幾特別

可能我地留咗係度 2日，比較休閒，又唔會有好多人纏住，感覺呢個城市好舒服。。。再見了 Rabat ! 

來到 Casa Voyageurs 車站，我地都係去返火車站旁的 Ibis 度住，在香港出發前已預訂了所有住宿，不過價錢就有唔同。來時只需 EUR45/晚，但呢晚就要 EUR63/晚，原因之一是 Ibis 這段時間逢星期一至四入住都會比星期五至日貴的，今日星期四所以要 EUR63/晚，但明天星期五就 EUR45/晚。。。真係唔明，通常 d 酒店係週末至週日比平日貴 d ，但 Ibis 係相反 ?!

Check-in 後在房抖咗一陣，我地唔想行咁遠，只在酒店對面的地道小店食三文治 MAD15/份，超平。

食飽在街上等 petti taxi 時，有個女人帶住細路來討錢。其實噚日在 Rabat 電車站已經有幾個細路周圍問人攞錢，我唔想比錢佢地。。。但係我今日就準備咗 d 食物，係之前在 Chefchaouen 的早餐。果份早餐其實很豐富，除咗有三文治，果汁外，重有很多水果同曲奇餅，因為食唔晒，如果再唔食放多幾日怕會變壞，所以我就將曲奇餅同水果比咗佢地，初時個女人都好奇怪點解我會比袋嘢佢，佢打開望咗一望，再遞比個小朋友，個細路睇完後見佢面帶微笑，見到佢地個反應，其實我都好開心。。。

我地坐 petti taxi 去哈桑二世清真寺 (The Hassan II Mosque) 參觀，因為有咗之前嘅經驗同朋友的提示，所以我地都唔再問價，反而係預定一個價錢 MAD20，問 d 司機去唔去，當然好快就有司機接受我地嘅 offer 啦。

The Hassan II Mosque 是 Casablanca 的地標，也是少有對外開放讓非回教徒參觀的清真寺之一。清真寺於1987年興建，共用了6年時間到1993年才竣工，特別之處是他有部份是建築在大西洋海面之上，有著全世界最高之宣禮塔 (200米高)，而清真寺的現代化設備也是令我覺得很驚訝的。。。

但參觀不能以個人身份入內參觀，必須參加他們的導覽團，門票 MAD120，有指定時間，但參觀時間有時會更改，最好到出發時再查詢。

我地的導覽團是15:00開始，買門票時會有個貼紙比你同跟旅行團一樣，旁邊有膠袋可以攞來放鞋，因為清真寺入面係唔可以著鞋的。。。相比起傳統的清真寺，呢個清真寺就比較開放，女士唔須要帶頭巾，衣著都無特別限制，著短袖衫褲都無問題。

導遊有說英語，法語，意大利語及西班牙語的，我地當然只可選擇說英語的導遊啦。。。

我地自顧自的影相，有些時候都會聽漏導遊的介紹。。。出發之前也有從網上得知這個清真寺有一個電動化的屋頂，可在 5 分鐘內完全打開。。。勁!

除了從網上得知這個現代化設施外，導遊還介紹了這個大門是電動式直立向上升起打開的。

宣禮塔是有電梯的，而它頂上的圓球，原來唔係裝飾咁簡單，是可發出雷射光線，指向聖城麥加的方向 (估計是讓信徒可面向那個方向朝聖)，聽到這些後真的很佩服當年的清真寺設計師咁有心思而又咁前衛。。。

祈禱的主大堂建築及設計都好華麗，有一點點感覺似天主教堂， 但大堂只開放了部份，有些地方是被圍起不能參觀的

頂上閣樓是女士專用祈禱的地方，而男士當然是在地下主大堂

有些地方地面是玻璃的，可透視下層的沐浴室

可參觀的沐浴室也是很大，其中一個沐浴室更有41個噴泉，可想而知可以容納幾多人。。。

很快地一個鐘頭左右的導覽就完結了，一點也不覺悶，反而覺得唔夠時間慢慢睇、慢慢影相添。。。

離開清真寺後我地在外面的廣場影咗一陣相，又坐咗一陣享受下廣場上的休閒。

離開廣場後在行去 medina 途中才發現相機的皮套唔見咗，於是又行返去廣場搵，可惜搵唔返。。。廣場的清潔工人都好有效率，之前已見佢地不斷在打掃廣場，皮套應該是被清理走了。。。

我地向 medina 方向行，來到見到電車軌，原來我地到了 Place des Nations Unies Tramway 站，這是我地第一日來摩洛哥時從 Rick’s Café 行過來的車站，而家就可以睇清楚呢度個環境。我地見有 McDo，就去飲杯嘢，食杯雪糕坐下先

坐咗一個鐘左右我地才搭電車返去 Casa Voyageurs火車站，到站後我地先買定明天去機場的車票，再在周邊行了一圈睇下有咩食，不過多數都是很地道的小店，無乜吸引的餐廳，我地唔想再搵，最後都係行返去火車站對面的 Café 點了一些多士之類的小食做晚餐 (唔記得影相) ，食完就返酒店休息了。