2013北非摩洛哥 Day 8 @ Fez

2013北非摩洛哥 Day 8 @ Fez (21-Sep-2013)

Dar Hafsa 雙人房價 EUR40/晚，3人房 EUR50/晚，包早餐，我地會在這裡住2晚。因為我地明天會一早離開，昨晚已問清楚，可否安排早d食早餐，但他們一口拒絕了，說工人上班時間是在8點，準備好後最快也要9點才有早餐食，女兒還大條道理的說其他客人有這要求也是一樣，意思說她們是一視同仁，沒有特別厚待別人。。。我地更決定今晚返來食杯麵，問可否用廚房，他們又是一口拒絕，說危險不方便我們使用，最後才很免强的說會到時給我們熱水。。。

天台可看到遠處的Borj Nord，我地今日會上去

所以今早安排了在9點食早餐， 枱上都放滿了各式各樣的麵包，總共有10種之多，而且也有不同的醬料，大叔說這些麵包都是菲斯的地道食物，而且有些麵包一定要點蜜糖來食才算正宗，我們聽起來覺得他很固執，但另一角度睇，佢好自豪他的早餐是這樣豐富地道及傳統。。。我地見咁多麵包食唔晒，Aicha 便把剩低的袋起，準備明天搭車時可以食。。。

今天的行程重點最主要是去皮革染坊，其次便是在這個古城內周圍行及參觀。吃完早餐，準備出門時，大叔說如果看到喜歡的東西，先記住它的款式不要買，因為那些店舖品質都不太好，回來他會帶我們去 <品質比較好的店舖>，我聽了便算，因為我地應該都唔會買好多嘢。。。我又覺得就算佢帶我地去買都唔一定又平又好。。。

10:30出門，古城內的店舖才開始陸陸續續開門

我地在小巷內左穿右插，老公想靠 GPS 找去皮革染坊的位置，可惜在城內接收到的訊號很弱，而小巷內不斷有人纏住話可以帶你去。。。

 

兜兜轉轉，行了差不多一個鐘，終於見到有個牌指示去皮革染坊的方向


行下行下，我地行到去Place R'CIF廣場內。

走出城門，影咗一陣相

我地覺得無可能在城外，所以又行返入城，又搵咗大半個鐘，有個細路走來問我地想去邊，話帶我地去。

因為實在有 d 攰，所以都跟咗佢行唔再自己搵，細路帶我地行條路，之前我地都經過 d 外圍，但佢帶我地行 d 巷中巷，如果唔係有人帶真係唔識行。。。

到了一個皮革染坊店前，店員在門外熱情招呼我地，我地事先聲明唔會買嘢，再問係咪免費參觀，佢地話係。店員遞上薄荷葉，聞薄荷葉可以辟味，但個場唔算好嗅，都算可以接受。嗅味其實來自鴿糞，係皮革軟化劑。。。場地比較細，而且好多染色池都無水，所以影相效果唔係咁好。

我地影咗20分鐘左右就走了。離開時店員問我地要小費，說至少也要給招呼我地果個店員，其實我地都一早準備好，給了他 MAD20。帶路的細路在在門外等我地要小費，我地都準備咗MAD5 給他，他想要多d，我地無理佢。

本來想去 Medersa Bouinania 參觀，但剛巧是祈禱時間，職員叫我地半個鐘頭後再來。

在附近走走，見到有今朝我地食的麵包賣

Medersa Bouinania 是一所神學院，參觀費 MAD10，內裡有一個祈禱的地方，不對外開放，只有教徒才可進入。


由於可以參觀的地方只有地下中庭，所以影下相半小時便可離開。

我地在入口處坐低影相，當地人見我地用smartphone 影相很是好奇，更好樂意幫我地影 J。

14:30我地未食晏，又唔想再食 tagine，老公在地圖上搵到 Burger King，按住指示我地行出舊城

經過一個好似有 d 歷史的公園

穿過 Bab Ftouh 城門

中途抖咗一次，去到 Borj Fez Mall 時已15:45了。。。

Burger King 的價錢同香港差不多，雖然 MAD 同港幣兌換率差不多，但覺得這裡的生活指數應該比較低，Burger King 算是遊客價錢了。。。

食完抖咗一陣，我地去家樂福行下，打算買 d 配料今晚食杯麵。。。伊斯蘭教視猪為不潔食物，所以我地食開的午餐肉，在這裡賣的成份都是雞肉或牛肉了。

買完17:30左右，時間剛剛好，係時候上去 Borj Nord 看Fez的全景 (因為地方空曠太早可能會好熱)。在 mall 外找不到的士，我地行去附近的大路，可能是收工時間，很難找到 grand taxi。

這裡的的士好似泥鰻的咁，有指定的目的地，坐齊人就會開車，我地搵唔到車正在茫然之際，有個坐於 petit taxi 上的女仔落車，話讓架車比我地坐，因為 d 司機多數唔識講英文只懂法文，她更幫我地同d司機講我地要去邊同講好價錢。朋友先坐車離開，我地捉住個女仔，想佢幫我地再搵車，個女仔真係好好人，咁啱 d 車走晒，佢陪我地等咗成20分鐘先有車，佢見老公攞住個電話重叫佢小心因為街上不太安全。。。佢同我地唔同路，幫我地上咗車講好價錢(MAD30) 先自己去截車。。。車上其實重有一個女人，司機在中途放低佢就繼續車我地去目的地。

落車後見唔到 d 朋友，我地繼續向山上行，兜咗一個圈都見唔到佢地，我地失散了。我同老公自己影咗幾張相，老公發覺之前 bookmark 咗的地點同我地而家的位置有不同，我地決定行過去原先 bookmark 的位置睇下會唔會有機會搵到佢地。


行過一個小山坡，這邊多很多人比較熱鬧，d 人坐晒响度睇 Fez 全景，沿途都不見朋友，我地繼續行，諗住由另一邊行落山，跟住好似聽到有人叫我地，原來朋友在這裡，真好! 我地又會合了。


我地話我地落車的地方望Fez全景比較靚，於是又帶朋友過去影相。。。影相其間有個放羊的伯伯對我地說山上入黑後唔安全，叫我地不要在這裡留太耐，我地見天也快黑，影咗幾張相就走了。

回程經過Bab Boujloud，經過餐廳，那些伙計又在拉客，有個認得我地的說你地昨晚無來食，今次去我地店食，我地當然無理佢。。。。

回到民宿的小巷，又見到昨天的小孩，小孩又問同一問題: “Are you Spanish? French? Italian?” 似係慣性問題，佢已忘記昨天我地見過，佢有問過我。。。J

因為要大叔煲水需時，我先去沖涼，沖完涼時間啱啱好，他們已食緊麵，第二轉熱水也剛煲好，坐低就有得食。之前要大叔煲水他已很免強，跟住我問佢要多杯熱水，佢第一反應就話無，佢個女話咗佢幾句，佢先在煲內倒比我說這是剩餘最後唔會再有。。。我覺得這服務很差，連要一杯熱水這基本的要求也不能做到，作為一間民宿，這是完全不合格!

更離譜的是食飽我地在大廳坐，突然頭上的吊燈息咗，我地都好愕然，原來是大叔息的。大叔的女兒都即刻鬧佢，大叔先問我地只開壁燈有無問題。。。。我地覺得佢好無禮貌，好似意思係我地要返房，唔好留係廳，想趕我地走咁。。。。因為第二朝我地要早起，坐多一陣我地都返房瞓了。