2013北非摩洛哥 Day 2 @Marrakech

2013北非摩洛哥 Day 2 @ Marrakech (15-Sep-2013)

早上6:30 check out 離開酒店，行去旁邊的火車站搭 6:50開出去馬拉客什(Marrakech) 的火車。因之前看過網上意見，見議搭first class，因為有劃位。 Second class 是自由蓆，要同其他人爭位坐，如果無位坐，便要企幾個鐘了。

去馬拉客什火車票first class MAD140，車程3.5小時。每6位乘客一個車廂，3個座位是對坐的，車廂內有行李架，因為行李架在頭上，我地只可將比較輕及細件的托上去，其餘的只放在腳前。我地5人原本同另一人一個廂，佢有個朋友過來搵佢，唔知係咪見到我地咁迫，叫佢過去坐，所以我地就包廂了。





因為太早我地都無買早餐，諗住在火車上買。車行咗一陣，有餐車推過，只得2件芝士及2件雞肉三文治(每件MAD20)，全部比我地買晒，我就要咗麵包(MAD7)。

老公要咗芝士三文治，佢話唔好食，朋友話雞肉三文治都唔好食，我食果件有朱古力餡，類似牛角包嘅就非常好味。

在走廊周圍影下相，朋友之前想行去其他車卡度睇下，佢話鎖咗過唔到，我諗住又試下行，差唔多行到去另一卡門前，見到有個男人係門邊柯緊尿，嚇到我即刻返轉頭唔敢再行。。。

馬拉客什火車站都幾靚。

一出火車站，照例有很多司機過來兜生意，開價MAD100，我們回價MAD50，司機要收60，我地無睬佢，之後有一個收50，成交! 我地跟佢去攞車，行咗幾步，原先話要收我地60果個司機，唔知同我地個司機講咗d乜，個司機居然反口話要收我地60，我地當然唔接受，7咀8舌的鬧佢，最後佢當然係收50啦。(唔知係咪佢地同行有個暗價，唔可以低過某個價錢，做壞佢地個市??)

車去到舊城區 (medina) 某個城門前停低，司機話到啦，老公一直用gps睇緊行車路線，見離目的地仍有一段距離，以為佢收小咗錢所以求其去到咁尚下就放低我地，我地當然唔落車，要佢繼續行，爭論咗一陣，我地開始意識到車其實入唔到城內，我地唯有落車。 一落車，已經有幾個推住手推車的人在準備幫我地車 d 行李，我地唔需要這個付費服務，自己攞返自己的行李走。

老公出發之前已經準備好 d 離線地圖，bookmark 晒 d 景點，酒店，餐廳等要去的地方，靠 gps + 離線地圖，在 medina 內沿大街一直行咗約15分鐘，轉入一條小巷就去到我地住果間 riad (民宿，多數是舊城區內的舊屋改建而成) 。

Riad 主人 Bouchra 立即沖了一壺薄荷茶給我地。我地抖咗一陣，Bouchra 帶我地參觀這楝大宅。 這是一間很漂亮的 riad，一共有4個房間，每個房間都有不同的佈置，天台、地下中庭及地下小廳都佈置得很別緻，好舒服。個小廳我地每次外出回來都會係度坐一陣，好似返到屋企咁。

分配好房間後，抖咗一陣我地就行返出去站馬廣場 (Place Jemaa El Fna)，d人又叫佢做不眠廣場，夜晚好熱鬧，當地人就簡單地叫 big square。由 riad 行去大概15分鐘路程。

在摩洛哥，馬拉客什是最多遊客到來的城市，因為接近歐洲，所以歐洲人最多，亦因此當地人亦愛收歐羅。馬拉客什的地標必然是Place Jemaa El Fna，很多人慕名而來，原因是廣場上有吹著笛子弄蛇的人，穿著鮮艷的賣水的人，說故事，玩音樂的人，充滿著一千零一夜的氣氛。雖然他們每天都重覆在廣場上擺賣著，但每日的景象都不同，所以在2001更被聯合國列入為世界非物質文化遺產。

因為來到摩洛哥我地只在機場換咗好少錢，來到馬拉客什，第一件事就要去換錢。網友話去郵局附近的找換店個rate好的。換完錢，我地就在廣場內的小店食午餐。

埋單的時候，之前幫我地落單的老伯一路執枱，一路低聲講 tips! tips! 我地不以為意，亦沒有比tips，佢就話 no tips? Oh my god! 當時我地都覺得好好笑，因為在香港我地而家都好少比tips，有好多餐廳亦開始唔收加一，所以我地都無呢個習慣。但原來，在當地tips是佢地期望必收的。。。

離開廣場，我地行去參觀附近的景點。因為建築用的泥土所含的礦物質帶紅色，所以建築物都以紅色為主，因此馬拉客什這城市又叫紅色城市。

Place Moulay el Yazid (門票MAD10)，根據介紹，這個清真寺的特色是它的T形建築，大庭院及華麗講台。後來成為皇室陵墓 (Saadian Tombs)。這地方不算大，我們沒有導覽，唔使半個鐘便可以行完，當然也會miss咗關於這地方的歷史。

咁啱有一班人請了導遊介紹，說細心睇牆上面是寫上很多阿拉伯文字的，有些文字更是經文來的。唔講都無為意。


跟住再行大概15分鐘去另一景點

Palais Bahia (門票MAD10)，這裡曾是皇宮，有2公頃之大。Bahia 意思是 magnificent，可以想像這皇宮以自己的華麗宏偉而自豪。

參觀完我地又行返去Place Jemaa El Fna，在medina的市集(souk)內行，當地人一見到我地就會問 Japan? 見我地無反應就會問Korea? China? 佢地都好好奇想知我地係邊度來，多數以為我地係日本人，但一見到我地用三叔電話就會話China。。。又幾醒喎。。。

因為之後會去沙漠，我地都想買條頭巾來影下相。有網友話MAD25都買到，問過好多間都開價MAD80，我地繼續行，入到去一間舖頭問，個老闆居然話要MAD1000!!!! 雖然佢係笑笑口咁同我個朋友講，朋友回價MAD20，佢就揮手示意我地走，說you know the door。當時我地反應唔到，佢就Pow! Pow ! Pow! 好似開鎗咁，場面好似好攪笑，但其實真係好無禮貌。。。!!




接近黃昏時間，我地去咗廣場一間餐廳的天台晚飯，順便影下日落時廣場的風景。

餐廳只有MAD100的套餐，食物選擇不多，以tagine及couscous為主。Tagine是當地的傳統煮食方法，是一個有三角錐形蓋的鍋，因為蓋內有比較多空間可以保留很多熱蒸汽，以炆煮的方法，食物可以煮得好腍好入味。而Couscous是一種小麥粉，細細粒好似飯咁，不過帶甜味的。我地每人點一份，有羊肉，雞肉，蔬菜，一齊share食。我地原先坐在欄邊影相，跟住風雲變色，更落起大雨來，d雨撇晒入來，而且好大風，我地唯有轉移到室內。

在摩洛哥食飯，都要習慣”摩洛哥時間”，一般由落單到上菜，要等45分鐘左右。

埋單的時候，侍應在帳單上寫住+25，我地問係乜，佢話係tips! 雖然我地都好奇怪，不過唔想再同佢理論，嘥氣，唯有照比。個人認為餐廳服務係好基本，如果侍應服務得好好，tips都應該由客人自己決定比幾多，如果強制要客人比幾多，那就不是tips，而是服務費，應該在餐牌上例明!

離開餐廳已是21:00，大家都覺得攰，我地行返去riad，souk內的店舖都開始陸陸續續收舖，我地行錯咗少少路，不過好快都搵得返條路，返返riad。返到去3個男人重話要食杯麵，飲薄荷茶，職員講解了廚房的大概設備，叫他們隨便自己來，自由度好大，好似自己屋企咁。