2013北非摩洛哥 Day 1 @Casablanca

2013 北非摩洛哥 Day 1 @Casablanca (14-Sep-2013)

提起摩洛哥，相信大多數人會聯想到北非諜影，Casablanca，三毛流浪記等等，雖然我都係諗起呢d，但係都只係聽得多，認識得少。。。

今次呢個長假期，都是在變數之中產生，而其中一個最主要原因當然是平機票的吸引。我們乘搭的卡塔爾航空 (Qatar Airways) 票價連稅都只是HKD7千， 真的很吸引，航班時間都幾好，是在0120起飛，飛8個鐘到多哈轉機，然後再搭多8個鐘到Casablanca。

多哈夏令時間慢香港5個鐘，冬令時間是慢6個鐘。摩洛哥夏令時間慢香港時間7個鐘，冬令時間是慢8個鐘。之前睇資料說是在9月初轉冬令時間，但去到時仍未轉，問當地人幾時會轉，他們也不知，說政府到時會公佈的。(我地驚走時轉咗而唔知，計錯時間就麻煩了。)

出發當日，老公就請咗假，我就放工之後返屋企食完飯，沖埋涼先一齊出發去機場。(而家年紀大了，捱唔到夜，我諗下次搭夜機的話，果日我都要放假，休息下，唔可以直踩了。)

香港時間零晨2點幾派飛機餐，本來諗住唔食，比個胃抖下，但見到有薯蓉，就忍唔住食咗個餐。。。

早餐有粥食，唔錯!

因為太攰，又無乜電影好睇，所以幾乎全程瞓覺瞓到多哈。。。

在香港check-in時，登機証是入落一個黃色的紙套內，原來這個黃色是有意思的，代表轉機的客運大樓，如果是藍色就是去入境客運大樓，棗紅色就是first & business class。。。


到達多哈，要坐接駁巴士去客運大樓，巴士就是先到有藍色外框的入境大樓，再到有黃色外的框轉機大樓，搭接駁巴士都要幾耐，由落飛機坐車去到轉機大樓，至少有20分鐘。

到達轉機客運大樓，見到人山人海，個個都是在等轉機，我地要等5個鐘先可以再上機，於是在一間café坐下，但其實我地無幫襯，坐咗一陣見有d人買咗嘢食又無位坐，都有d唔好意思。。。朋友話之前check過轉機大樓有免費餐派，所以我地離開找找派餐的地點，但職員說幾個月前已取消了這個派餐服務。。。諗住行去我地個登機閘坐，但因為果邊幾乎收唔到wifi，最後我地在一個比Qatar客人轉機的休息專區坐下。

終於夠鐘登機，我地坐中間果排，飛機唔算多人。

好好彩，我果行得我同老公2個坐，於是我就打橫瞓晒3個位。。。

空姐見我之前瞓咗，留咗個餐比我，等我瞓醒時問我食唔食。


可能唔夠瞓，呢程機搭得特別辛苦，一直係度瞓，可能太樣衰，到準備landing時，受到空姐關注，走來問我are you ok? 。。。氣壓問題，頭痛加耳仔痛，到地面就會無事了。

提取行李後，就先在機場換小小錢先，因為我地諗住去到馬拉客叶先再換，因為果度個rate 會好d。港幣大概9元可換10元摩洛哥幣 (Moroccan Dirham “MAD”)，歐元及美金是比較暢通的貨幣，換完錢，就搵下有無電話咭賣。搵倒有2間賣電話咭的，一間有的不是3G咭，另一間說是3G但就貴，所以我地決定去到市區先再搵。於是我地就落一層去火車站坐火車去市區。

ONCF火車公司都幾有系統，由機場去市區(Casa Voyageurs)每一小時一班，車程30分鐘，頭等卡票價MAD60，不過這一程頭等是自由蓆，沒有劃位的。車卡有上下層，人不多，所以大把位任坐。

到達了Casa Voyageurs，我地第一時間在車站內的小店搵電話咭，最後在其中一間搵到賣MAD150的3G咭一個月內無限上網，可打電話及IDD，店員幫我地開通張咭，寫低咗個pin code比我地，因為如果息咗機或者斷咗network都要入返個pin code 先可以上到網。 老公帶多一個電話入呢張咭做wifi hotspot (長開wifi好食電), 我地5個人可以共用，所以呢張咭好抵。

電話咭就是在左手邊灰色那小店買

攪掂咗電話咭後，我地就買定明天去馬拉客叶的火車票再行過隔離的Ibis Hotel check-in。朋友早在香港時已上網book咗1900在Rick’s Café 晚飯，但我地應該趕唔切，叫酒店職員幫我地打電話去改1930。

返房放低行李後，就出去搵的士了。之前已知到大多的士唔會按咪錶收費，去Rick’s Café車程大概10分鐘，的士果真開天殺價，petit taxi 只可以坐3個乘客的要 MAD50，grand taxi 可以坐6個乘客的要MAD100。。。當然我地唔會接受，其實摩洛哥都好似其他發展中的國家一樣，會有好多白牌的士，有架面包車說MAD50車我地去，成交!

司機有少少crazy，聽聽下歌突然轉播Gangnam Style，又拍手，又郁身郁勢非常之high，其實佢想攪下氣氛啫。到達後我地問佢攞咗電話諗住走時再搵佢。

Rick’s Café 之所以出名，是因為電影Casablanca的原故，但其實電影Casablanca並不是在此取景，反而是這間餐廳按照電影的場景而裝修，因而占了其名氣。

餐廳食物質素都幾好，價錢亦唔算好貴，生豪亦非常好味，這餐MAD1千元有找

食飽打電話比剛才的司機，打了2次也cut了線，以為他唔想接我地 (返到酒店老公先知原來佢有打返比我地，但我地miss咗)。 問餐廳職員這裡坐的士回去Casa Voyageurs要多少錢，說大概MAD100 (未知是指petit taxi 定grand taxi)。。。我們便決定行大概20分鐘路去最近之Place des Nations Unies Tramway站, 搭Tramway回酒店，自助售票機只接受硬幣，唔收紙幣，而且每次只能買一張票，唔可以一次過買幾張，由於我地唔夠散銀，又換唔到散銀，唯有在一個賣花生的小檔消費，買了一包花生，只有一抓手咁多，盛惠MAD5，我地比MAD50叫佢比d散銀我地，老板笑住找錢，我諗果包花生最多只值一蚊，不過都幾好味。

電車車票劃一票價MAD6，車票一蚊，即如果第一次買要MAD7，車票可以重用10次，下次再用只須用同一張票reload MAD6 便可搭一程。

因為搭咗2x幾個鐘飛機，又有時差，明天又要早起離開，回到酒店，我地沖涼就瞓覺了。